གནས་མཆོག་བྲག་དཀར་བུམ་པ་སྟོད་པའི་སྒྲ་དབྱངས།།

བསིལ་ལྡན་ཀེ་ལཱ་ཤ་ཡིའི་གངས་འདབ་ཀྱི་ཁྲོད་དུ།།
རང་སྣང་དྭགས་པ་ཟངས་མདོག་དཔལ་རིའི་ཡི་སྣང་བརྙན།།
མངོན་སུམ་གསལ་བས་ཨེ་མ་རྨད་བྱུང་གི་ནོར་བུ།།
མཚོ་སྐྱེས་བླ་མའི་བྱིན་རླབས་ཁོ་ན་ལས་གྲུབ་བོ།།

དྭངས་གསལ་དྲི་མ་མེད་པས་ཤེལ་དཀར་གྱི་མེ་ལོང༌།།
མ་བཅོས་ལྷུན་གྱིས་གྲུབ་པའི་རང་བྱུང་གི་རི་མོ།།
མངོན་སུམ་གསལ་བའི་བློ་འདས་ཡེ་ཤེས་ཀྱི་བདུད་རྩི།།
གནས་མཆོག་འདི་རུ་འཛོམས་པས་ལྟ་སྒོམ་གྱི་སྤྱོད་ཡུལ།།

ཕྱི་ལྟར་བྱང་སེམས་ལམ་བཟང་དགེ་འདུན་གྱི་སྒྲུབ་སྡེ།།
ནང་ལྟར་འདུལ་འཛིན་མཁས་པས་ཚུལ་ཁྲིམས་གྱི་སླབས་པ།།
གསང་བ་ཆོས་ཉིད་རོལ་བས་མཇའ་ལུས་ཀྱི་འོད་གསལ།།
སྐད་གཅིག་ཉིད་ལ་གྲོལ་བས་ཀ་དག་གི་གཞི་མ།།

དང་པོ་རྟོགས་ལྡན་བླ་མས་རིག་ངོ་ཞིག་སྤྲོད་ཅིང༌།།
བར་དུ་དབེན་པས་གནས་འདིར་ལྷན་འཛོམས་རེ་བྱས་ནས།།
ཐ་མར་མན་ངག་ལྡན་པས་ཉམས་ལེན་ཞིག་བྱུང་ན།།
གཞོན་ནུ་བུམ་སྐུར་གྲོལ་བ་ཐེ་ཚོམ་རང་མི་འདུག།།

འཇའ་ལུས་ཆོས་སྐུ་ཐོབ་པས་གདམ་ངག་ཞིག་དགོས་ན།།
འོག་གསལ་སྣང་གཞི་ཉེ་ལམ་རང་ཤར་གྱིས་བསྐྱངས་ནས།།
མཚུངས་མེད་དཔལ་ལྡན་བླ་མས་ཐུགས་དགོང་གི་མདུད་པ།།
གནས་མཆོག་འདི་རུ་དཀྲོལ་བས་མཐར་ཐུག་གི་རེ་སྨོན།།
ཅེས་པ་གནས་མཆོག་བྲག་དཀར་བུམ་པ་སྟོད་པའི་སྒྲ་དབྱངས་ཞེས་བྱ་བ་འདི་ཉིད་ཁུ་བོ་རྩི་མེ་མཆོག་གི་ཐུགས་དགོངས་ལྟར་གནས་ཆེན་རྡོ་རྗེ་གདན་དུ་རབ་བྱུང་ ༡༧ ཤིང་བྱ་ལོ་ཟླ་༡༢ ཚེས་ ༧ ཉིན་ཆུ་དམར་པ་དྷརྨ་ཛུཥྱ༔དེས།།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།