དགོངས་ཚུལ།

ལི་ཐང་དུ་བརྒྱད་གཅིག་དམག་གི་དུས་ཆེན་བསྐྱར་གསོ་ཐུབ་བམ།

ལི་ཐང་གི་ཕུལ་བྱུང་དཔའ་བོ་རུང་རྒྱས་ཨ་གྲགས་ལགས་ཀྱིས། ཕྱི་ལོ་ ༢༠༠༧/༨/༡ ཉིན། བོད་དོན་ཆེད་རྒྱ་ནག་གཞུང་ལ་ངོ་རྒོལ་གྱིས་སྐད་འབོད་ཤུགས་ཆེར་བྱས་པས་ཁོང་འཕྲལ་དུ་འཛིན་བཟུང་བྱས་པ་དང༌། དེ་ནས་བཟུང་ད་བར་མི་ལོ་ཧྲིལ་པོ་བརྒྱད་ཀྱི་རིང་ས་གནས་དེར་བརྒྱད་གཅིག་དམག་གི་དུས་ཆེན་སྲུང་བརྩིའི་རྟ་རྒྱུག་འདུ་འཛོམས་དེ་ཚོགས་ཐུབ་མེད་པ་རེད།

དེ་སྔ་དུས་ཆེན་དེ་ལི་ཐང་གྲོང་འདབ་ཀྱི་མདོ་སྡེ་ཐང་ཞེས་པའི་སྤང་ཐང་དེར་འདུ་འཛོམས་བྱེད་ཀྱི་ཡོད་ཀྱང༌། ད་ལོ་དུས་ཆེན་དེ་བསྐྱར་གསོའི་ཆེད་ལི་ཐང་འཐིལ་ནས་ལེ་དབར་ ༥༠ ལྷག་སར་ཡོད་པའི་འབུམ་ཡག་ཐང༌། ཞེས་པའི་འབྲོག་ས་དེར་དུས་ཆེན་སྲུང་བརྩི་ཡི་རྟ་རྒྱུག་འདུ་འཛོམས་ཤིག་བསྡུས་ཡོད། འོན་ཀྱང་ལས་འགུལ་དེར་རྒྱའི་འདོད་པ་ཁེངས་མེད་པ་རེད།/>

རྒྱ་ལ་དགོས་པ་དེ། གུང་ཁྲན་ཏང་གིས་རྒྱ་ནག་གི་སྲིད་དབང་རྒྱུན་སྐྱོང་བྱ་ཐུབ་པ་དང་དྲག་པོས་གཅིག་བསྡུད་བྱ་ཐུབ་པ། དེ་མཚུངས་བོད་ཀྱི་གནད་དོན་ཡང་དུས་ཡུན་ཐུང་ངུའི་ནང་གྲགས་མེད་འགུལ་མེད་བཟོ་ཐུབ་པ་བྱ་རྒྱུ་དེ་རེད། དེར་བརྟེན་བརྒྱད་གཅིག་དམག་གི་དུས་ཆེན་བསྐྱར་གསོ་ཐུབ་པ་བྱ་རྒྱུ་ཡང་དོན་སྙིང་ཆེན་པོ་ལྡན་ཡོད་པ་རེད། བོད་ཕྱོགས་ནས་ཉེ་བའི་ལོ་ཤས་ནས་གུང་ཁྲན་གྱིས་བོད་ལ་གཅིག་འོག་གཅིག་གནོན་དང་དྲག་པོས་ཐོབ་ཐང་བཙན་འཕྲོག་བྱས་པ་སོགས་ཀྱིས་དབང་གིས། གོ་ཚོད་ལྟར་ན་ལི་ཐང་དང་དེའི་ཉེ་འགྲམ། དཔེར་ན། ལི་ཐང་རྫོང་དུ་བོད་མི་ ༤༦༤༠༥། ཉག་ཆུ་རྫོང་དུ་བོད་མི་ ༣༧༨༧༧ ། འབའ་རྫོང་དུ་བོད་མི་ ༤༡༨༠༢ ། ཉག་རོང་རྫོང་དུ་བོད་མི་ ༣༨༢༧༧ ། རྟའུ་རྫོང་དུ་བོད་མི་ ༤༠༩༢༠ ། ཡོད་པ་སོགས་ས་གནས་དང་ཉེ་འཁོར་བོད་མི་རྣམས་ཆབ་སྲིད་ཀྱི་ཐད་ནས་ཡོངས་སུ་གཉིད་སད་པ་མ་ཟད་མགོ་བོ་ཡང་ཕྲན་བུ་བཀྱག་ཡོད་པའི་ཐོག ལྷག་པར་ན་གཞོན་ཚོའི་ཀླད་པའི་སྒུལ་སྐྱོད་ཤུགས་ཆེ་རུ་སོང་བའི་རྒྱུ་མཚན་བཅས་ལ་བརྟེན་ནས་མི་ལོ་ཧྲིལ་པོ་བརྒྱད་ཀྱི་རིང་དམག་གི་དུས་ཆེན་དེ་བསྐྱར་གསོ་བྱེད་བཅུག་མེད་པ་རེད། དེར་བརྟེན་བརྒྱད་གཅིག་དམག་གི་དུས་ཆེན་དེ་མུ་མཐུད་སྲུང་བརྩི་ཐུབ་མིན་དེའང་རྒྱ་ཕྱོགས་ནས་དངུལ་གྱི་སྟོབས་ཤུགས་དང་གོ་གནས་བེད་སྤྱོད་གཏོང་སྟངས། བོད་ཀྱི་ཕྱོགས་ནས་གནས་ཚུལ་གྱི་གོ་རྟོགས་དང་ལ་རྒྱའི་སྙིང་སྟོབས་ལ་འབྲེལ་བ་ཆེན་པོ་ཡོད་པ་རེད།

ལི་ཐང་དུ་ད་ལོའི་དམག་གི་དུས་ཆེན་སྲུང་བརྩི་བྱས་པའི་ཉེ་བའི་དུས་ཚོད་ནང་ལི་ཐང་གི་གནས་ཚུལ་འདྲ་བའི་གསར་འགྱུར་མང་པོ་ཞིག་རྒྱ་ནག་གུང་ཁྲན་ཏང་གི་དྲྭ་ཚིགས་ནང་ཐད་ཀར་བཞག་ཡོད་པ། དཔེར་ན། ༢༠༡༦/༧/༢༨ ཉིན་གྱི་འབའ་ཐང་རྩྭ་ཐང་གི་སྐྱ་རྩལ་འགྲན་བསྡུར་དང༌། ༧/༣༠ ཉིན་གྱི་ཁམས་སེར་ཤུལ་སྦྲ་གུར་དུས་ཆེན། ༧/༣༠ ཉིན་གྱི་མཚོ་སྔོན་པོའི་རྒྱལ་སྤྱིའི་གཞུང་ལམ་གྱི་རྐང་འཁོར་འགྲན་བསྡུར། ༧/༣༠ ཉིན་གྱི་མཚོ་སྔོན་མགོ་ལོག་གི་བྱིས་པའི་སྒྱུ་རྩལ་ཟློས་གར། ༨/༡ ཉིན་གྱི་"བརྒྱད་གཅིག" དམག་བཙུགས་དུས་ཆེན་སྲུང་བརྩིའི་ཆེད་ཧྲང་ཧའེ་གླུ་གར་ཁང་གི་ཟློས་གར་འཁྲབ་སྟོན། བཅས་གུང་ཁྲན་ཏང་གི་དྲྭ་རྒྱའི་གསར་འགྱུར་སོགས་སུ་ཆེད་གཏོང་བྱས་ཀྱང༌། ལི་ཐང་ནས་བརྒྱད་གཅིག་དམག་གི་དུས་ཆེན་སྲུང་བརྩི་བྱས་པ་དེ་བརྒྱུད་ལམ་དེ་དག་ནང་ཆེད་དུ་མ་བཏང་བ་རེད། འོན་ཀྱང་རྒྱལ་ནང་གི་གསར་འགྱུར་ཆུང་ཁག་ཏུ་གནས་ཚུལ་དེ་བཏང་བཅུག་ནས་དེའི་བརྙན་ཐུང་རེ་ཟུང་སྤྱི་ཚོགས་དྲ་ལམ་དུ་གཏོང་ཙམ་གཏོང་ཙམ་བྱས་པ་རེད།

དེས་གནད་དོན་ག་རེ་མཚོན་ཡོད་ཟེར་ན། གཅིག་ནི། ད་ལོའི་རྟ་རྒྱུག་དུས་ཆེན་སྲུང་བརྩི་བྱས་པ་དེས་ས་གནས་མི་མང་གི་མངོན་འདོད་ཚོད་ལྟ་བྱས་པའམ་སྤྱི་ཡོངས་ཀྱི་གནས་ཚུལ་ལ་རྟོག་ཞིབ་བྱས་ཞིག་ཡིན། གཉིས་ནི། རྫོང་གི་ལས་བྱེད་ཚོས་དབུས་གཞུང་ལ་ལས་དོན་དེའི་ཐད་གཞུང་དོན་ཧུར་བསྐྱེད་བྱེད་ཀྱི་ཡོད་པའི་བརྡ་ལན་ཙམ་གཏོང་བའི་ཆེད་དུ་ཡིན། གསུམ་ནི། དབུས་གཞུང་གི་ཆོག་མཆན་མེད་པར་ལས་དོན་དེ་རྩོམ་མི་སྲིད་པས་རྒྱའི་ཕུགས་རེ་ལྟར་བསྐྱར་གསོ་བྱེད་མ་ཐུབ་པར་བརྟེན་འདོད་བློ་མ་ཁེངས་པའི་རྣམ་འགྱུར་ཕྱིར་མངོན་པ་ཞིག་རེད། བཞི་ནི། གསར་འགྱུར་ཆུང་ཁག་ཏུ་གཏོང་བཅུག་པ་ནི་ཕྱིའི་རྣམ་པ་ཙམ་འགྲེམས་སྟོན་བྱས་པ་དང་མང་ཚོགས་ནང་དེ་འབྲེལ་གྱི་གནད་དོན་ཇི་ཡོང་ལྟ་རྟོགས་བྱ་ཆེད་བེད་སྤྱོད་པ་ཙམ་རེད།

དམག་གི་དུས་ཆེན་དེ་ལི་ཐང་རྫོང་གིས་ ༢༠༡༦/༧/༢༥ ནས་བཟུང་ཚེས་ ༣༡ བར། ཉིན་དྲུག་གི་རིང་གྲ་སྒྲིག་བྱས་ཏེ་ཕྱི་ཟླ་ ༨ ཚེས་ ༡/༢/༣ བཅས་ཉིན་གསུམ་རིང་ཚོགས་ཡོད། སྤྱིར་ལི་ཐང་རྫོང་གཅིག་ལ་ཡུལ་ཚོའམ་ཤང་ ༢༤ དང༌། མི་གྲངས་ ༤༦༤༠༥ ཡོད་པ་རེད། རྫོང་གིས་ཇུས་འགོད་བྱེད་སྟངས་ཀྱི་ཆ་ནས། འབུམ་ཡག་ཐང་ལ་གཡོན་རུའི་ཧོར་རྙིང་སྡེ་པའི་དབྱར་སྐྱིད་རྟ་རྒྱུག་ཟིན་པ་དང༌། ལི་ཐང་གཡོན་རུའི་ཁོངས་ནས་ཚེ་མགོན་དང༌། དཔོན་སྐོར། ཧོར་རྙིང༌། བདག་གཞུང་མ་བཅས་ཀྱི་ཡུལ་ཚོ་བཞིའམ་ཤང་བཞི་ལ་འབུམ་ཡག་ཐང་དུ་གུར་སྒར་བརྒྱབ་བཅུག་ནས། ཁྱོན་སྡོད་གུར་ ༢༠༠ ལྷག་དང་མི་གྲངས་ ༩༣༠༠ ལྷག་འཛོམས་ཡོད་པ་རེད། རྫོང་གི་ལས་ཁུངས་ ༡༨ ཀྱིས་སྡོད་གུར་ཕུབ་ནས་ལས་བྱེད་ཀྱི་ཕ་མ་དང་འབྲེལ་ཡོད་ཙམ་ཉར་ཆོག་པ་ལས་གཞན་དོ་དམ་བྱས། མི་གྲངས་ཀྱི་ཆ་ནས་བལྟས་ཡོང་དུས་ལོ་རྗེས་མར་བརྒྱད་གཅིག་དམག་གི་དུས་ཆེན་དེ་མུ་མཐུད་ནས་ཚུགས་མི་ཐུབ་པར་འགྲེལ་བཤད་བྱས་ཀྱང་འདྲ་པོ་ཡོད་པ་རེད།

དེ་སྔ་ ༢༠༠༧ གྱི་གོང་ནས་རྟ་རྒྱུག་དུས་ཆེན་དེར་ལི་ཐང་རྫོང་རང་ཁོངས་ནས། ལི་ཐང་གྲོང་ཤོག་བརྒྱད། ལི་ཐང་དགོན་པ། མོ་ལ་སྟོད་སྨད་བར་གསུམ། འཇའ་བ། ཚོ་གསུམ། སྣ་བུ་སོགས་ཡུལ་ཚོའམ་ཤང་༢༤ དང༌། ལི་ཐང་ཡུལ་མིའི་ཁོངས་ནས་མགོ་ལོག་དང༌། ཨོ་ཐོག སྡེ་ཚ་སོགས་དང༌། རྫོང་གཞན་པའི་ཁོངས་ནས་སྡེ་རོང་དང་འདབ་པ། ཆ་འཕྲེང༌། འབའ་པ་སོགས་ནས་མི་སྣ་མཉམ་ཞུགས་བྱེད་ཀྱི་ཡོད་ཀྱང༌། ད་ལན་དེའི་ཐད་ལི་ཐང་རྫོང་ནས་གོང་འཁོད་ལི་ཐང་གཡོན་རུའི་ཤང་བཞི་ཕུད་པས། དེའི་ལྷག་མ་ཡོངས་རྫོགས་དམག་གི་དུས་ཆེན་དེར་མཉམ་ཞུགས་བྱ་མི་ཆོག་པའི་དམ་དྲག་བཀག་འགོག་ནན་ཆེར་བྱས་འདུག

འདི་ནས་མཐོང་ཐུབ་པའི་གནས་ཚུལ་གསུམ་ཡོད་ལ། གཅིག་ནི། ལི་ཐང་རྫོང་གི་ཡུལ་ཚོ་ལྷག་མ་ཉི་ཤུ་དང་དགོན་སྡེ་ཁག ལི་ཐང་གི་ཡུལ་མི་ཁོངས་ཀྱི་ཡུལ་ཚོ་གཞན་པ་དང༌། སྡེ་རོང༌། འདབ་པ། ཆ་ཕྲེང༌། འབའ་པ་སོགས་ཀྱི་བོད་མི་རྣམས་ལ་རྒྱ་ནག་གཞུང་དང་ལི་ཐང་རྫོང་གཉིས་ཀས་བརྡ་ལན་གང་འདྲ་ཞིག་སྤྲད་ཡོད་མེད་ཐད་འདི་ནས་འགྲེལ་བརྗོད་བྱ་མི་དགོས་པའི་གནས་ཚུལ་ཞིག་ཏུ་གྱུར་ཡོད། གཉིས་ནི། བོད་པ་ནང་ཁུལ་དུམ་བུར་བྱས་ནས་བེད་སྤྱོད་གཏོང་སྲོལ་ཡོད་པའི་གུང་ཁྲན་གྱི་སྲིད་ཇུས་དེ་བསྐྱར་དུ་འགྲེལ་བཤད་ཐེངས་གཅིག་བྱས་པ་དང༌། གསུམ་ནི། ལི་ཐང་རྫོང་གི་རྒྱ་འབྲེལ་གནད་ཡོད་མི་སྣའི་ཀླད་པའི་ཆུ་ཚད་ཤིན་ཏུ་དམའ་པོ་ཡིན་པའི་གནད་དོན་གསལ་པོ་ཆགས་པ་དང་ཕྱོགས་མཚུངས། རྫོང་གི་དབང་ཡོད་མི་སྣ་བསྐོ་བཞག་བྱེད་སྟངས་ཀྱི་གནས་ཚུལ་ཡང་གཅིག་འཐེན་གཅིག་སྐྱོར་གྱི་ལམ་ལུགས་དེ་མུ་མཐུད་གནས་བཞིན་པར་ཁ་གསལ་གཏིང་གསལ་ཆགས་པ་རེད།

སྐབས་དེའི་རྩེད་མོའི་རིགས་ནི། གཙོ་བོ་རྟ་རྒྱུག་དང༌། གཡག་རྒྱུག གླུ་ལེན་པ། བྲོ་འཆམ་པ། ཤད་ཤུགས་བསྡུར་བ་སོགས་སྣ་ཚོགས་ཤིག་གོ་སྒྲིག་བྱས་ཡོད་ཀྱང༌། རྩེད་མོ་དངོས་གཞིའི་སྐབས་སུ་ཕྱོགས་བཞི་ནས་དམག་གིས་ལྟ་རྟོགས་ནན་པོ་བྱེད་པ་དང་ཕྱོགས་རེར་དམག་མི་བརྒྱ་སྐོར་ཙམ་ཡོད། གོས་ནག་ཅན་གྱི་དྲག་དམག་གིས་རང་སྲུང་ཡོ་བྱད་དང་གློག་གི་དབྱུག་པ་སོགས་ཁྱེར་ནས་ཡར་འགྲོ་མར་འགྲོ་བྱེད་པ་ཙམ་ལས། སྤྱི་ཡོངས་ཀྱི་ཆ་ནས་དམག་མིའི་རྣམ་འགྱུར་ཧ་ལས་པའི་ཞི་འཇམ་ལྟ་བུ་རེད་ཟེར། འོན་ཏེ་འབྲོག་པའི་སྦྲ་དང་སྡོད་གུར་སོགས་ཀྱི་རྩེ་མོར་དམག་གི་དར་ཆ་སྒྲེངས་འཛུགས་བྱ་དགོས་པའི་བཙན་བཀའ་གཏོང་མཁན་ད་ལོ་མི་འདུག་ཟེར།

རྫོང་གིས་རྒྱང་གྲགས་ནས་དྲིལ་བསྒྲགས་བྱས་པ་ལྟར་ན། མི་ཉག་ར་རྔ་ཁ་ནས་དམག་མི་ ༨༠༠ སླེབས་ཡོད་པ་དང་དྲག་དམག་ ༢༠༠ ཡོད། ད་ལན་དམག་གི་དུས་ཆེན་འདིར་རྒྱག་རེས་བྱེད་མི་ཆོག སྡེ་ཤོག་ཕན་ཚུན་དབར་ཕན་ཚུན་དཀྲུགས་ཤིང་རྒྱག་མི་ཆོག སྡེ་པ་སོ་སོར་མིང་ངན་བཟོ་བའི་བྱ་བ་རྩོམ་མི་ཆོག དོ་བདག་སོ་སོ་ནས་གནས་ཚུལ་གང་བྱུང་མི་འབུད་པའི་འགན་ལེན་བྱ་དགོས། ཤོག་ཁའི་སྡེ་དཔོན་སོ་སོ་ལའང་འགན་ཆེན་པོ་ཡོད། རང་ཁོངས་ཀྱི་མི་གྲངས་དང་འགྲུལ་པ་མི་ངོ་ཤེས་པ་བྱ་དགོས་ཟེར།

རྒྱུག་རྟའི་བང་རྩལ་འགྲན་པའི་ཁྲོད་ཨང་རིམ་བཅུ་པ་བར་བྱ་དགའ་ཡོད་པ་དང༌། ཨང་དང་པོར་རྒྱ་སྒོར་ ༥༠༠༠༠ སྤྲད་ཡོད་པ་རེད། འོན་ཀྱང༌། ལྡོག་ཕྱོགས་ནས་མི་ལ་རྨས་སྐྱོན་བྱེད་པ་སོགས་གནས་ཚུལ་ངན་པ་ཇི་བྱུང་གི་འགན་ཡོངས་རྫོགས་ལི་ཐང་རྫོང་གིས་ལེན་གྱི་ཡིན་ཟེར། སྐབས་དེར་རྒྱུག་རྟ་ ༤༠༠ ཙམ་ཡོད་ནའང་རྒྱུག་རྟའི་བང་རྩལ་འགྲན་པར་སྡེ་ཤོག་གམ་ཡུལ་ཚོ་རེ་ནས་སྐྱ་མི་བཅུ་བཞི་རེ་ཐོ་འགོད་བྱ་དགོས་ཀྱི་ཡོད་པ་རེད།

གནས་ཚུལ་དེ་ནས་གནད་དོན་ག་རེ་མཐོང་གིན་འདུག་ཟེར་ན། གཅིག་ནི། རྒྱ་ནག་གཞུང་གིས་བོད་པའི་མི་སེམས་འགུག་ཐབས་མི་བྱེད་པར་ཇུས་འོག་ཏུ་བཙུད་པ་དང་སྡིག་རའི་འོག་ཏུ་མགོ་བོ་སྒུར་ཐབས་བྱེད་ཀྱི་ཡོད་པའི་རྣམ་པ་དེ་ཕྱིན་མངོན་པ་རེད། གཉིས་ནི། ཟུར་གཅིག་ནས་དམག་གིས་ཞི་འཇམ་གྱི་རྣམ་པ་མངོན་བཅུག་པ་དེས་གོམ་པ་དང་པོའི་ལས་དོན་ལམ་ལྷོང་ཡོང་བར་རྣམ་དཔྱོད་བེད་སྤྱོད་བྱས་པའི་ཁུལ་ཙམ་རེད། གསུམ་ནི། བོད་མི་རྣམས་རྟས་དྲུད་བཅུག་པ་དང་རྟ་ལ་མནར་གཅོད་སྤྱོད་ཚད་མེད་བཏང་ནས་བང་འགྲན་བཅུག་པ་དེས་བོད་པའི་གནའ་བོའི་ཡུལ་སྲོལ་དེ་དག་རྒྱ་ནག་གི་དེང་རབས་མི་སྣའི་གཙོ་བོས་བྱས་པའི་འཛམ་གླིང་མི་མང་ལ་འགྲེམས་སྟོན་བྱས་པ་ཞིག་ཡིན། བཞི་ནི། དམག་གི་དུས་ཆེན་ལ་མཉམ་ཞུགས་བྱས་པའི་བོད་མི་རྣམས་ལ་དམག་གི་སྡིག་རའི་འོག་ནས་སྤྲོ་སྐྱིད་དང་རི་སྐྱིད་གཏོང་བ་ནི་སྐྱིད་པོ་མེད་པར་དྲན་གསོ་གཏོང་བའམ་གོ་བརྡ་སྤྲད་པ་ཞིག་རེད།

བརྒྱད་གཅིག་དམག་གི་དུས་ཆེན་བསྐྱར་གསོ་བྱ་དགོས་པའི་དམིགས་ཡུལ་སྐོར་རྫོང་ནས་མི་ནས་མི་བརྒྱུད་དེ་སྤྱི་ཚོགས་ནང་སྐད་ཆ་བཀྲམས་པ་ནི། ༢༠༡༦/༧/༣༠ ཉིན་ལི་ཐང་དང་ཐག་ཉེ་བའི་རྫ་ཆུ་ཁའི་རྩྭ་ཐང་དུ་བོད་རིགས་མང་ཚོགས་ཁྲི་ལས་བརྒལ་བ་འཛོམས་ནས་རི་སྐྱིད་རྟ་རྒྱུག་བྱ་རྒྱུ་ཡིན་པ་དང༌། དེར་ལི་ཐང་གི་མི་མང་པོ་ཞིག་ཤོར་འགྲོ་བས། རྫོང་རང་རང་སོ་སོའི་ས་ཐོག་ནས་རང་ཚུགས་བརྟན་པོ་བྱས་ནས་རྩེད་མོ་རྩེ་དགོས་ཀྱི་རེད་ཟེར་བ་དེ་རེད། འོན་ཀྱང༌། སྤྱི་ཚོགས་ནང་གི་སྐད་ཆ་ལྟར་ན། ད་ལོའི་རྟ་རྒྱུག་དེས་བོད་པ་རང་གི་སྤྱི་ཚོགས་ནང༌། རྫོང་ཁག་གཞན་པའི་བོད་པ་དང་ལི་ཐང་རྫོང་གི་བོད་པའི་དབར། དགོན་པ་དང་མང་ཚོགས་དབར། སྡེ་ཚོ་དང་སྡེ་ཚོའི་དབར་སྐད་ཆ་མཐོ་དམན་མང་པོ་ཡོང་རྒྱུ་དང༌། སྡུག་ས་ནས་ཕན་ཚུན་འཁོན་འཛིན་དང་འགལ་ཟླ་ཆགས་རྒྱུའི་ཉེན་ཁ་ཡང་ཆེན་པོ་རེད་ཟེར།

དམག་གི་དུས་ཆེན་དེར་མཉམ་ཞུགས་བྱེད་མཁན་ཚོའི་ཁྲོད་ནས། ཐེངས་འདིར་དམིགས་བསལ་སྐྱིད་པོ་བྱུང་སོང་ཟེར་ངེས་མེད་ལ། འགོ་ཁྲིད་ཚོས་རྫིག་ཉམས་སྟོན་རྒྱུ་དེ་ཙམ་མ་རག་པ་དང་རྩེད་མོ་དུས་ཐོག་ཏུ་རྩེ་མ་ཐུབ་པ་སོགས་བྱུང་བས། གོ་སྒྲིག་པའི་འབྲེལ་ཡོད་ནས་བཤད་ན། ད་ལོ་ས་གནས་སུ་གློག་དང་ཆུ་མེད་པ། ལི་ཐང་འཐིལ་ནས་ལེ་དབར་ ༥༠ ཙམ་གྱི་སར་འགྲོ་དགོས་པ་སོགས་ཀྱིས་འགན་འཁུར་ལེན་དཀའ་བའི་གནས་ཚུལ་འདི་ལ་བལྟས་ན། ལོ་རྗེས་མར་ས་གནས་དེར་དམག་གི་དུས་ཆེན་དེ་ཚུགས་རྒྱུ་ཁག་པོ་རཻེད་ཟེར།

སྔར་ལམ་ལྟར་ན་དུས་སྟོན་ལ་ཡོང་མཁན་ཚང་མ་དངོས་གཞིའི་མཛད་སྒོར་མཉམ་ཞུགས་བྱེད་ཀྱིན་ཡོད་མོད། ད་ལོར་འབྲེལ་ཡོད་ལས་བྱེད་དང་དེའི་འབྲེལ་ཡོད་ཡིད་གཏན་འཕེལ་བ་སྐོར་ཞིག་གིས་ཟུར་དུ་དངོས་གཞིའི་མཛད་སྒོ་ཆུང་ཆུང་ཞིག་བསྡུས་འདུག་ལ། རྒྱལ་ཕྱི་ནང་དང་རྒྱལ་ནང་གི་ཡུལ་ལུང་རེ་འགའ་ནས་ཡུལ་སྐོར་སྤྲོ་འཆམ་པ་ཡིན་པའི་རྣམ་འགྱུར་སྟོན་མཁན་རེ་ཟུང་འདུག་ཀྱང༌། དེ་དག་ནི་རྫོང་གིས་གོ་སྒྲིག་བྱས་པའི་མཐོན་ཆེན་མགྲོན་པོ་ཤ་སྟག་རེད་ཟེར།

གསར་འགྱུར་ཐུང་ཐུང་འདི་ལས་རང་བཞིན་གྱིས་གད་མོ་ཤོར་འོང་བའི་གནས་ཚུལ། གཅིག་ནི། རྫོང་སྲིད་གཞུང་ནས་ལི་ཐང་དང་ཁ་ཐག་ཉེ་བའི་ཡུལ་ལུང་ཁག་དང་ལི་ཐང་གི་ཡུལ་མིའི་དབར་ཞེན་ཁོག་སློང་རེས་བྱས་པ་དེ་ནི། བོད་པ་རྣམས་ས་ཁུལ་གྱིས་བཅད་དེ་རྫོང་མང་པོ་བཟོས་པ་ནི་གུང་ཁྲན་གྱིས་རྒྱ་ནག་གི་སྲིད་དབང་རྒྱུན་སྐྱོང་བྱ་རྒྱུའི་རྩ་བའི་འཆར་གཞིའི་ནང་ཡོད་པར་ངོ་སྤྲོད་དང་དྲན་སློང་བྱས་པ་ཞིག་རེད། གཉིས་ནི། གཞུང་འབྲེལ་མཛད་སྒོ་ཆེན་པོའི་སྐབས་སུ་རྫོང་གི་དབང་འཛིན་པས་རྫིག་ཉམས་བྱ་རྒྱུ་གཙོ་བོ་བྱེད་པ་མ་གཏོགས་མཛད་སྒོའི་ལས་དོན་ལ་མཐོང་ཆེན་བྱེད་ཀྱི་མེད་པའི་གནས་ཚུལ་དེ་གསལ་པོ་ཆགས་པ་རེད། གསུམ་ནི། རྒྱ་ནག་གི་དབང་འཛིན་པའི་ངོས་ནས། རྒྱ་ནག་གི་རྫོང་སོ་སོའི་འགོ་ཁྲིད་ཀྱི་རྣམ་དཔྱོད་དང་འཇོན་ཐང་གཙོ་བོ་མི་བྱེད་པར་གོ་མིང་གཙོ་བོད་བྱེད་ཀྱིན་ཡོད་པའི་ནང་ཚུལ་དེ་ཕྱིར་ཐོན་པ་ཞིག་རེད། བཞི་ནི། རྒྱ་ནག་གཞུང་གིས་མི་མང་གི་མངོན་འདོན་དང་མི་མང་གི་ཐོབ་ཐང༌། མང་ཚོགས་ལ་བརྡབ་གསིག་ཐེབས་མིན་གྱི་གནད་དོན་དེ་གཙོ་བོ་མི་བྱེད་པར་གུང་ཁྲན་གྱི་ལྟ་བ་གཙོ་བོ་བྱེད་པ་དང་དམར་པོའི་བྱེད་སྒོ་ཁག་གཙོ་བོད་བྱེད་ཀྱི་ཡོད་པའི་ནང་དོན་དེ་ངོ་འཕྲོད་པ་ཞིག་ཡིན།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།