༼རྟོག་འགྱུའི་ང་རོ༽བཀླགས་པའི་མྱོང་ཚོར་ཐོར་བུ།

དེ་རིང་ནི་གཟའ་སྤེན་པ་ཡིན་པ་དང་། གཟའ་འཁོར་གཅིག་གི་སློབ་གཉེར་ལ་བྲེལ་ཞིང་ངལ་ དུབ་ཀྱིས་མནར་བའི་ལུས་པོ་འདི་ཡང་ཅི་ཞིག་ཀྱང་བྱེད་འདོད་མེད་པར་མལ་ཁྲིའི་ སྟེང་འགྱེལ་ནས་བསྡད་པ་ན། གློ་བུར་ཏུ་མལ་ཁྲིའི་འགྲམ་གྱི་དེབ་སྒམ་ཐོག་བཞག་ཡོད་པའི་གྲོགས་མཆོག་སེར་ཤུལ་རིན་ཆེན་དོན་གྲུབ་ལགས་ཀྱིས་བརྩམས་གནང་མཛད་པའི་ དེབ་ཕྲེང་ཞེས་པ་དེ་མཐོང་པ་དང་། དེབ་དེས་ ཀྱང་བདག་ལ་“ང་ཀློག་དང་་་་་ཁྱེད་རང་གི་ངལ་དུབ་དེ་བརླགས་ངེས་”ཞེས་བརྗོད་པ་ ལྟར་ངའི་མིག་ངོགས་སུ་མཐོང་སྣང་བདེ་པོའི་ངང་བཞག་འདུག་པས་ངས་དེབ་ཕྲེང་དེ་ ཀློག་འགོ་བརྩམས་པ་ཡིན།

དེ་ ཡང་དེབ་དེའི་ནང་རྩོམ་པ་པོས་“རིགས་པའི་རྣོ་ཁ་ཡི་གཟི་དཔལ་ཐེག་ཐབས་མེད་ པའི།། རྒྱུན་སྲོལ་གཙིགས་འཛིན་གྱི་འདུ་ཤེས་རྗེས་ལ་བཞག་སྟེ།། མྱོང་རིག་ཐོས་ གསུམ་གྱི་བདེ་སྣང་ཡིད་ལ་བསུས་ནས།། གནས་ལུགས་ལྕགས་མཁར་གྱི་སྒོ་ཆེན་ཤུགས་ ཀྱིས་འབྱེད་དོ”ཞེས་ཚིག་གིས་བཅད་ནས་གསུངས་གནང་མཛད་པའི་ཤོ་ལོ་ཀ་འདིས་བདག་ལ་ རྩོམ་པ་པོ་རང་ཉིད་ཀྱི་གུ་ཡངས་ཀྱི་སེམས་ཁམས་དང་། སོ་སོའི་རིག་པས་དཔྱད་ཞིབ་ ཏུ་གཙོ་བོར་འཛིན་པའི་ཚོར་སྣང་སོགས་མངོན་པ་གསལ་ཞིང་བློ་ཐག་ཆོད་པོའི་མི་གཤིས་ ཤིག་ཀྱང་སེམས་ངོགས་སུ་ལྷང་ངེར་ཤར་ཏུ་འཇུག་པས་ངས་དེབ་ཕྲེང་འདི་མུ་འཐུད་ཀློག་ འདོད་ཀྱི་ཚོར་བ་ཞིག་ངང་གིས་སྐྱེས།

རེད་ ཡཱ་་་་རྩོམ་པ་པོས་“བླ་སྲོག་གི་གཟི་ཉམས་དཔྱོད་ཤེས་ཀྱིས་མྱོང་དགོས”ཞེས་གསུངས་ པ་འདི་ནི་ཅི་མི་བདེན། ང་ཚོ་མི་མང་པོས་བླ་སྲོག་གི་གཟི་ཉམས་དེ་ཉིད་ཇི་ལྟར་ འཚོལ་སྒྲུབ་བྱེད་དགོས་མིན་མི་ཤེས་པར། ནམ་ཀུན་ཏུ་མགོ་སྙོག་རྐྱང་རྐྱང་བཙལ་ གྱིས་ཡོད་པ་རེད། ཁོང་གིས་རང་ཉིད་ཀྱི་སེམས་ཚོར་ཙམ་  མིན་པར་རྣམ་དཔྱོད་ཀྱིས་ འབྱེད་པའི་བླ་སྲོག་གི་གཟི་ཉམས་ལ་འཚོལ་བསྙེགས་ཀྱི་གོམས་ཁ་བསྒྱུར་པ་ནི་རླབས་ ཆེན་ཞིག་རེད་སྙམ་པའི་ཚོར་བ་ཞིག་སྐྱེས་ལ། བླ་སྲོག་གི་གཟི་ཉམས་དེ་ཉིད་དཔྱོད་ ཤེས་ཀྱིས་མྱོང་དགོས་པའི་གདམས་ངག་དེའང་ང་ཚོ་ཤེས་མེད་བླུན་པོ་རྣམས་ལ་དགོས་ ངེས་ཤིག་ཀྱང་ལོས་ཡིན།

ཡང་ ཁོང་གིས་“སྙན་ངག་གིས་མིའི་སེམས་ཁམས་ཀྱི་མཛེས་པ་མཐོར་འདེགས་བྱེད་པའི་གནས་ ལུགས་ཀྱི་གོ་དོན་རྟོགས་མཁན་ནི་སྐད་ཡིག་འདི་བཀོལ་སྤྱོད་བྱེད་མཁན་གྱི་གྲས་ན་ གྲངས་ཀ་ཉུང་ཉུང་ཞིག་རེད”ཅེས་གསུངས་པ་འདིས་ཁོང་གིས་སྙན་ངག་འབྲི་བའི་དགེ་མཚན་ རྟོགས་ཤིང་། སྙན་ངག་བྲིས་པའི་འབྲི་རྩལ་ཀྱང་ཡོད་རིགས་རྣམས་ལ་ཟུར་ཟར་ དང་། འདི་ལྟར་རང་ཉིད་ཀྱི་སྐད་ཡིག་དང་རིག་གཞུང་ལ་གདུང་བ་མེད་ཅིང་བཀོལ་སྤྱོད་ ཀྱི་གཤིས་ལུགས་མེད་རིགས་རྣམས་ལ་ཡིད་ཐང་ཆད་པའི་སྐྱོ་གཏམ་སྨྲས་པའང་དོན་དངོས་ དང་མཐུན་པ་ཞིག་ལོས་ཡིན། དེང་སང་ང་ཚོས་སྤྱི་ཚོགས་ཀྱིས་སོ་སོའི་རྩོམ་རིགས་ལ་ རིན་ཐང་དེ་ཙམ་མེད་པར་མཐོང་ནས། སོ་སོས་ཀྱང་དེ་རིགས་ཀྱི་གནས་ལ་མཁས་ཤིང་བྱང་ཆ་ ལྡན་ནའང་། དེ་ཉིད་བཀོལ་སྤྱོད་བྱེད་པར་རིན་ཐང་མི་འདུག་སྙམ་པའི་ནོར་འཁྲུལ་ གྱི་བསམ་བློའི་འཁྱེར་སོར་ཞིག་གི་དབང་གིས། སྔར་ལྟར་སྙན་ངག་འབྲི་བའི་སྲོལ་དེ་ དགུན་ཁའི་ཆུ་བོ་ཇི་བཞིན་ཇེ་ཆུང་དུ་འགྲོ་བཞིན་ཡོད་པ་དང་། སྤྱི་བཏང་ནས་རྩོམ་ པ་པོ་ནི་གཉེད་ཀྱི་བཟི་བའི་སྤྱི་ཚོགས་དེ་ཉིད་སྨྱུག་གུ་དང་ཤོར་བུའི་ལག་ཆ་ནས་ གཉེད་དཀྲོགས་མཁན་ཞིག་ཡིན་པ་དང་། རྩོམ་པ་པོའི་ནུས་པ་ནི་སུས་ཀྱང་འགྲན་ཟླ་མེད་ པ་ཞིག་ཡིན་ནའང་། དོན་དངོས་ཐོག་ང་ཚོའི་སྤྱི་ཚོགས་ནང་རྩོམ་པ་པོ་རྣམས་སྤྱི་ ཚོགས་ཀྱི་ཤུགས་རྐྱེན་འོག་ཏུ་མགོ་བོ་ཐུར་ཏུ་གཟེབ་ནས་རང་ཉིད་ཀྱིས་ནུས་པ་དེ་ ཉིད་ཐབས་བརྒྱ་ཇུས་སྟོང་གིས་འདོན་མཁན་དཀོན་ལ། དེ་ནི་ང་ཚོའི་མི་རིགས་ཀྱི་ གྱོང་གོད་ཞིག་ལོས་ཡིན་ལགས་ན། རྩོམ་པ་པོས་མ་གསང་དྲང་པོས་འདོན་པའི་ནོར་འཁྲུལ་ དང་སྐྱོ་སྣང་གི་ཁེངས་བའི་སྐད་ཆ་འདི་ཚོ་ང་ཚོས་ཅེས་ཀྱང་བསམ་བློ་གཏོང་དགོས་གལ་ ཆེ་སྙམ།

དེབ་ འདི་ནི་་་དང་བཅས་ཚན་པ་བཞི་རུ་བགོས་ཡོད་པ་དང་། དེ་ ཡང་ཁོང་གི་ཚན་པ་དེ་དག་ཀྱང་“དབྱངས”ཞེས་པའི་ཡི་གེ་དེ་སྦྱར་པ་དང་། དེས་གྲུབ་ པའི་ཚན་པ་བཞི་རུ་གནས་པ་དེའང་། ཁོང་གི་དེབ་ཕྲེང་འདི་ཉིད་འགོ་ནས་མཇུག་བར་ ཐེངས་ཤིག་བཀླགས་པས་ན། ཁོང་གི་བརྗོད་བྱའི་དོན་གཟབ་ཞིང་བརྗོད་བྱེད་ཚིག་གི་ འགྲོས་སོགས་རྣ་བར་སྙན་ཞིང་ཡིད་དུ་འོངས་བ་ཤག་སྟག་ཡིན་ལགས་ན། དེ་ཡང་ཁོང་ གིས་“དབྱངས”ཞེས་པའི་ཡི་གེ་དེ་ཉིད་སྤྱད་པ་མིང་དོན་མཚུངས་ཞིང་དོན་དམ་དང་ཡོངས་ སུ་མཐུན་པ་ཞིག་རེད་འདུག་སྙམ།

དེ་ ཡང་བཟང་སྤྱོད་སྨོན་ལམ་ལས་ཇི་སྙེད་སུ་དག་ཕྱོགས་བཅུའི་འཇིག་རྟེན་ན།། དུས་ གསུམ་གཤེགས་པ་མི་ཡི་སེང་གེ་ཀུན།། བདག་གིས་མ་ལུས་དེ་དག་ཐམས་ཅད་ལ།། ལུས་དང་ ངག་ཡིད་དང་བས་ཕྱག་བགྱིའོ་ཞེས་འཕགས་པ་བཟང་པོས་ཇི་ལྟར་གསོལ་བ་འདེབས་པ་ བཞིན། རྩོམ་པ་པོས་དེབ་ཀྱི་ཚན་པ་དང་པོ་སྟེ་དད་པའི་དབྱངས་ཀྱི་ནང་དུ་ཁོང་གི་ དྭངས་ཤིང་དྲི་མས་མ་གོས་པའི་བླ་སློབ་ཀྱི་དམ་ཚིག་དང་། སོ་སོས་རང་ཉིད་ཀྱི་བཀའ་ དྲིན་བླ་མེད་ཀྱི་དགེ་བའི་བཤེས་གཉེན་ཚོར་ཡོད་པའི་སྒོ་གསུམ་ཟོལ་མེད་ཀྱི་དད་པ་ དང་གུས་བཀུར་སྨོན་འདེབས་སོགས་མངོན་པར་གསལ་བཞིན་ཡོད་པ་མ་ཟད། རྩོམ་པ་པོས་དོན་ གཟབ་ཞིང་གོ་སླ་བའི་ཚིག་གི་སྦྱོར་བ་དང་། དོན་གྱི་སྟོན་ཕྱོགས་སོགས་ནི་སྲོལ་ རྒྱུན་སྙན་ངག་གཞན་དང་མི་འདྲ་པར། རབ་འབྲིང་ཐ་གསུམ་གྱི་ཀློག་པ་པོ་ཚང་མར་བརྡ་ ལན་སྤྲོད་ཐུབ་པ་དང་། ནང་དོན་རྟོགས་ཐུབ་པར་བྱེད་པའི་ཁྱད་ཆོས་འདུག་ལ། དེ་ནི་ བོད་ཀྱི་མཁས་པའི་དབང་པོ་རཀ་ར་རིན་པོ་ཆེ་མཆོག་ནས་ནམ་ཀུན་ཏུ་བོད་ཡིག་བཀོད་ སྤྱོད་ཀྱི་ཁྱབ་ཁུངས་དེ་ཉིད་རྒྱ་བསྐྱེད་གཏོང་པ་དང་། བོད་རིགས་གཞོན་སྐྱེ་ཚོར་ བོད་ཡིག་སྦྱངས་འདོད་ཀྱི་བློ་སྐྱེས་སུ་འཇུག་དགོས་ན་ངེས་པར་ཏུ་འབྲི་རྩོམ་དང་ སློབ་དེབ་དེ་རིགས་སུ་མདོ་བསྔགས་ཆོས་ཚིག་གི་ཐ་སྙད་མཐོ་པོ་དེ་འདྲ་བེད་སྤྱོད་ གཏོང་མི་རུང་བ་ནི་གནད་འགག་ཡིན་ཞེས་གསུངས་ཀྱི་གདམས་ངག་དང་ཡོངས་སུ་མཐུན་ཞིང་། རྩོམ་པ་པོའི་ཚིག་དོན་གྱི་སྦྱོར་ལུགས་དང་འགྲོས་ལུགས་སོགས་ནི་ཀློག་པ་པོ་སུ་ ཞིག་ཡིན་རུང་གོ་བ་ལེན་ཐུབ་པའི་ནུས་པ་འདུག་ལ། ཁྱད་ཆོས་ཀྱང་འདུག་པས་ང་རང་ངོས་ ནས་ཞེ་དྲགས་ཡག་པོ་འདུག་སྙམ་པའི་ཚོར་བ་བསྟེར།

དེབ་ ཕྲེང་འདིའི་ཚན་པ་གཉིས་པ་སྟེ་ལ་རྒྱའི་དབྱངས་ཀྱི་འགོ་བརྗོད་ཚུལ་ཏུ་རྩོམ་པ་ པོས་“ལ་རྒྱའི་གླུ་སྐད་བསྒྲགས་ཤིང་ཚེ་སྲོག་གི་བདེན་དོན་བསམ་པའི་གོམས་གཤིས་ དེ་ཡང་གྲིབ་ནག་བཞིན་བདག་ལ་འགྲོགས་པར་གྱུར”དེ་ཡང་ཁོང་གིས་གནས་ལུགས་འཚོལ་ཞིབ་ ཀྱི་རྣམ་དཔྱོད་ལ་སྐྱབས་བཅོལ་ནས་བྱུང་བའི་ལ་རྒྱ་ཞིག་ཡིན་པ་གསུངས་འདུག་ པས། དེ་ནི་དོན་དམ་གྱི་གནས་ལུགས་ཡང་དག་ཅིག་ལོས་ཡིན། སོ་སོའི་མི་རིགས་དང་ རྒྱལ་ཁབ་ལ་གདུང་བའི་ལ་ཞེན་ནི་རྣམ་དཔྱོད་ཀྱི་རྩལ་ནས་བྱུང་དགོས་པ་ཞིག་ལས་ རྨོངས་རྟུག་གིས་མཆོང་རྒྱུགས་བྱེད་པ་ནི་ག་ལ་རུང་ལ།གལ་སྲིད་དེ་ལྟར་ལས་བྱུང་ བའི་ལ་ཞེན་ཞིག་ཡིན་ནའང་། ལ་ཞེན་ངོ་མ་ཞིག་མིན་པ་ནམ་ཞིག་ཉི་འོད་འོག་གི་འཁྱགས་ རོམ་ཇི་བཞིན་བཞི་རྒྱུ་ཉག་ཅིག་རེད། རྩོམ་པ་པོའི་“ཚེ་སྲོག་སྟོང་གི་རྨི་ལམ” གྱིི་ནང་ཁོང་གིས་དྲང་བདེན་གྱི་ཐུར་ནུས་ལ་བཅངས་བའི་ཡིད་ཆེས་དང་། རེ་བ་ལས་ མཛེས་སྡུག་རྣམ་པ་བཀྲ་བའི་རྨི་ལམ་ཞིག་ངང་གིས་མཐོང་ཐུབ་ལ། མི་རིགས་འདིའི་ཚེ་ སྲོག་གི་འཕེལ་རིམ་དང་། མ་འོངས་བའི་འཆར་སྣང་ཞིག་ཀྱང་གསོམ་ཉམས་དོད་པོས་ བསྐྲུན་འདུག། ཡང་ཁོང་གིས་“མེ་ལྕེ་དང་སྙིང་སྟོབས།”“ཚད་ལྡན་གྱི་དཔའ་བོ་དང་ སྐྱེས་བུ་ཚོ།བཟོད་པ་གསོལ་ལོ”“ཁྱེད་ཀྱི་སྤོབས་པས་ང་ཡི་མགོ་བོ་བཏེགས”“དཔའ་བོ་ རྟོགས་བརྗོད་”སོགས་ཉམས་འགྱུར་གྱིས་ཕྱུག་ཞིང་སྡེབ་སྦྱོར་གྱི་འགྲོས་སྒྲིལ་ བའི་ཚིག་བཅད་སྙན་ངག་འདི་ཚོས་རྩོམ་པ་པོའི་རང་ཉིད་ཀྱི་མི་རིགས་ལ་བཅངས་བའི་ གདུང་སེམས་དང་། གངས་ཅན་ཁ་བའི་ལྗོངས་ཀྱི་བདེ་སྡུག་དོན་དུ་རང་ལུས་མེ་མཆོད་ ཕུལ་བའི་དཔའ་བོ་དཔའ་མོ་ཚོར་གུས་བཏུད་དང་རྗེས་དྲིན། རང་གི་མི་རིགས་ཆགས་འཇིག་ ཏུ་གནས་བའི་དོན་དངོས་སུ་སོ་སོས་རང་ཉིད་ལ་དམ་བཅའ་དང་། སྐུལ་དེད་སོགས་གནང་ ཡོད་པར་ངང་ངང་ཤུགས་ཀྱིས་སྟོན་འདུག་ལ། རྩོམ་པ་པོས་གོ་སླ་ཞིང་དོན་གཟབ་བའི་མི་ རིགས་ལ་ཞེན་རིང་ལུགས་ཀྱི་སྣང་བརྙེན་གསོན་པོར་བསྐྲུན་བའི་སྙན་རྩོམ་འདི་རིགས་ ནི་དངོས་གནས་ད་ཡོད་གངས་ཅན་ཡུལ་ཏུ་ཆེས་མཁོ་དགོས་ཆེ་བའི་རྩོམ་ལུགས་ཤིག་ རེད། ཁོང་གིས་“རང་དབང་དམ་པ་”ཡི་ནང་རྒྱ་གར་ནས་འཚེ་མེད་ཞི་བའི་ཐབས་ལམ་ནས་ལོ་ ངོ་བརྒྱ་ཕྲག་མང་པོར་རང་དབང་གི་དོན་དུ་འཐབ་རྩོད་བྱས་པའི་གྲུབ་འབྲས་སུ་རང་ དབང་རང་བཙན་འཐོབ་པའི་དུས་དྲིན་ནས།ཡིད་མོས་དང་། རེ་བས་ཁེངས་བའི་སེམས་ཚོར་ མངར་སྐྱུར་འདྲེས་མའི་སྣང་བརྙེན་ཞིག་འབུར་ཏུ་ཐོན་ཐུབ་ཀྱི་འདུག་ལ། སྙན་རྩོམ་ འདི་བརྒྱུད་དེ་ང་ཚོར་ངེས་པར་ཏུ་དྲང་བདེན་དང་འཚེ་མེད་ཞི་བའི་ལྟ་གྲུབ་ལ་ཡིད་ ཆེས་དང་རེ་བ་བཅོལ་འོས་པའི་གདམས་ངག་ཅིག་ཀྱང་ཅི་ལ་ཡིན་མི་འོས་སྙམ།

ང་ ཚོས་ནམ་ཀུན་ཏུ་མི་མང་པོ་ཞིག་ལ་རང་མོས་སྙན་ངག་ཟེར་དུས་ངེས་པར་ཏུ་གོ་དཀའ་ཞིང་ ཚིག་སྦྱོར་དམིགས་བསལ་ཅན་ཞིག་ལ་ཡིན་དགོས་པའི་ཚོར་བ་ཞིག་ཡོད་པ་དང་། དོན་དངོས་ ཐོག་རང་མོས་སྙན་ངག་ནི་དེ་ལྟར་རང་དགོས་པའི་ངེས་པ་ཞིག་ག་ལ་ཡོད།དེ་ཡང་ཇི་སྐད་ དུ་རྩོམ་ཡིག་ཡག་ཤོས་ནི་མི་ཚང་མས་དོན་རྟོགས་སླ་བའི་རྩོམ་ཡིག་དང་། ཚིག་སྦྱོར་ དབྱངས་ལྟར་སྙན་བའི་རྩོམ་ཡིག་ཡིན་ཞེས་གསུངས་པ་བཞིན། རྩོམ་པ་པོས་དེབ་ཕྲེང་ འདིའི་ནང་“མེ་ལྕེ་དང་རྨི་ལམ”“མཐུན་སྒྲིལ་བསུ་བ”“རྒྱལ་ཁའི་སྟོབས་ཤུགས”“རེ་ རླབས་དགུ་སྒྲིལ”“ཤེས་རིག”དང་“སེམས་ཀྱི་ལྷ་ས”སོགས་རང་མོས་སྙན་ངག་ཁ་ཤས་ཡོད་པ་ དང་། དེ་དག་ཀྱང་ཐུན་མིན་གྱི་སྒྱུ་རྩལ་ལྡན་ཞིང་དམིགས་བསལ་གྱི་བྲོ་བ་ལྡན་པ་ ཤག་སྟག་རེད་ལ།  རང་མོས་འདི་དག་གིས་རྩོམ་པ་པོའི་མི་རིགས་ལ་གདུང་ཞིང་རིག་གནས་ ལ་ཞེན་པའི་ཚོར་རླབས་དེ་ལྷུབ་ལྷུབ་ཏུ་འཕྱུར་བའི་སྣང་བརྙན་ཞིག་མེ་ལོང་ཇི་ བཞིན་གསལ་གསལ་ཐིང་ཐིང་གིས་མཐོང་རྒྱུ་ཡོད་པར་སོམ་ཉི་མེད།

ཡང་ དེབ་ཕྲེང་འདེའི་ཚན་པ་གསུམ་པ་སྟེ་དཔྱོད་པའི་དབྱངས་ཀྱི་ནང་དུ་རྩོམ་པ་པོས་སོ་ སོའི་ལྟ་སྤྱོད་དང་རིག་པས་དཔྱད་ཞིབ་ནས་བྱུང་བའི་གནས་ལུགས་དང་། ནང་པའི་ལྟ་ གྲུབ་ལས་བྱུང་བའི་དོགས་དཔྱོད་སོགས་གསལ་ལེར་སྟོན་འདུག་ལ། དེས་ཀྱང་ནང་བསྟན་ ཤེས་རིག་འདི་ཉིད་བླུན་རྟུལ་གྱི་གནས་སུ་གྱར་བའི་ཁོངས་མེད་ལུང་མེད་ཅིག་མིན་ པར། དེ་ནི་དངོས་ཐོག་བདེན་འཚོལ་གྱི་ལམ་ནས་ར་སྤྲོད་ཐུབ་པའི་བདེན་པའི་གནས་ ལུགས་འབའ་ཞིག་ཡིན་པ་སྟོན་འདུག་ལ། དེ་ཡང་ཁོང་གིས་གོ་བདེ་ཞིང་བྲོ་བ་ལྡན་པའི་ ཚིག་ཕྲེང་རེ་རེ་ནས་དམིགས་བསལ་གྱིས་སེམས་ཚོར་ཞིག་སྤྲོད་ཀྱིས་འདུག་ལ། མདོ་ བསྔགས་སོགས་ཐ་སྙད་མཁྲེགས་པོ་དེ་འདྲས་མ་བཀྲེས་པར་གོ་སླ་ཞིང་དོན་གཟབ་བས་དངོས་ གནས་འབོར་ཏུ་ཐོན་པའི་ཁྱད་ཆོས་ཤིག་འདུག་པའི་སེམས་ཚོར་སྐྱེས།

བཤད་ སྲོལ་ལ་འཇིག་རྟེན་འདིའི་སྒང་ལ་སྡུག་བསྔལ་ཆེ་ཤོས་ནི་བསམ་བློ་བ་དང་དོན་ལྡན་ གྱི་རྕོམ་པ་པོ་ཡིན་ཞེས་པ་བཞིན་དེབ་ཕྲེང་འདིའི་ཚན་པ་བཞི་པ་སྟེ་ཚོར་བའི་ དབྱངས་ཀྱི་ནང་དུ་རྩོམ་པ་པོ་རང་ཉིད་ཀྱི་དགའ་སྐྱོ་སོགས་སེམས་ཚོར་འདྲ་མིན་ སྟོན་གྱིས་འདུག་ལ། ཁོང་གིས་ཚོར་ཡན་འདི་ཚོ་ཡང་ས་མཐའ་ནས་སྒུམ་པའི་དྭ་ཕྲུག་ ཅིག་གི་མིག་ཆུ་དང་གདུང་བ་ཡིན་ཞེས་གསུངས་པ་ལྟར། འདི་ནི་ང་ཚོ་ལས་དབང་དང་ཆབ་ དཔལ་སོགས་ཀྱིས་ཕོངས་བའི་བཙན་བྱོལ་དྭ་ཕྲུག་ཚོའི་སྤྱི་སེམས་ཀྱི་ཚོར་བ་ཞིག་ ཀྱང་ལོས་ཡིན། ཚོར་བ་འདི་དག་གི་ནང་ལ་འཇིག་རྟེན་ལ་ངེས་འབྱུང་སྐྱེས་བའི་ཚོར་བ་ དང་། མི་རིགས་ཀྱི་བདེ་སྡུག་ལས་བྱུང་བའི་ངུ་འབོད། བླ་མ་ལ་དམ་ཚིག་གཟབ་བའི་ བརྩེ་བ།འཇིག་རྟེན་འཕྲུལ་སྣང་གིས་བཟི་བའི་ཚོར་སྣང་སོགས་ཚོར་བ་འདྲ་མིན་གྱིས་ བསྐྲུན་བའི་འདོད་ཁམས་པ་ཞིག་གི་སེམས་གཤིས་རྣལ་མ་དེ་མངོན་གྱི་འདུག་ལགས་ ན། ཀློག་པ་པོ་སུ་ཞིག་ཡིན་ནའང་སེམས་ཚོར་སྟོང་གི་སྒྱུ་འཕྲུལ་ནས་དགའ་སྐྱོ་སྣ་ ཚོགས་ཀྱི་ཚོར་བ་ཞིག་ངང་གིས་བསྟེར་ཐུབ་པ་ནི་ཁོང་གི་དེབ་ཕྲེང་ཡི་ཁྱད་ཆོས་གཞན་ཞིག་རེད་སྙམ།

རྩོམ་ པ་པོའི་མཇུག་གི་དྲན་གསོ་ཞེས་པའི་གཏམ་གླེང་ནང་འདི་ལྟར“གཏོང་ཕོད་ཀྱི་ཕྱག་ཟུང་ ཡངས་པའི་སྦྱིན་བདག་རྣམས་ཀྱིས་ཀྱང་དཔལ་འབྱོར་གྱི་སྦྱིན་བདག་གནང་སྟེ་དེབ་ གཟུགས་འདི་ཀློག་མཁན་དག་གི་སྤྱན་ལམ་དུ་བསྟར་ཐུབ་པ་བྱུང་”ཞེས་གསུངས་པ་འདིས་ ངས་ཤེས་རིག་གིས་ཕྱུག་ཀྱང་དཔལ་འབྱོར་གྱིས་ཕོངས་ནས་རང་ཉིད་ཀྱི་རྣམ་དཔྱོད་ཀྱི་ རྩལ་དང་གངས་ཅན་རྩོམ་རིག་གི་བང་མཛོད་དུ་སོ་སོའི་ལེགས་སྐྱེས་ཙམ་ཡང་ཕུལ་མ་ཐུབ་ པར་བློ་འགྱོད་དང་། སྡུག་བསྔལ་གྱིས་མནར་བའི་“སློང་མོ་བ་”མང་པོ་དྲན་སོང་ལ། ཁོང་རྣམ་པའི་སྒྱུ་རྩལ་གྱིས་ཕྱུག་བའི་རྩམ་ཆོས་སོགས་ཀྱང་དེབ་གཟུགས་སུ་མཐོང་ རྒྱུ་བྲལ་བའི་གནས་ཚུལ་སོགས་ཡིད་ལ་དྲན་ནས་བློ་ཕངས་སྐྱེས། ད་ཐེངས་དེབ་གཟུགས་སུ་བཀོད་ཐུབ་པ་དང་ང་འདྲ་བའི་ཀློག་པ་པོ་ གང་མང་ལ་རྩོམ་པ་པོའི་ཉམས་འགྱུར་ཕྱུག་ཅིང་ཁྱད་ཆོས་ལྡན་པའི་རྩོམ་ཡིག་སོགས་ མིག་ངོར་མཐོང་རྒྱུ་བྱུང་པ་བྱས་པ་ནི་གཏོང་ཕོད་ཅན་ཚོའི་རླབས་ཆེན་གྱི་གཟི་ བརྗིད་རེད་ལ། ངས་ཀློག་པ་པོ་ཞིག་གི་ངོས་ནས་ཁོང་རྣམ་པར་སྙིང་ཐག་པ་ནས་ཐུགས་ རྗེ་ཆེ་ཞུ་རྒྱུ་ཡིན། མ་འོངས་པར་གངས་ཅན་ཁ་བའི་ཡུལ་དུ་འདི་དག་སོ་སོའི་ཤེས་ ཡོན་དང་དཔལ་འབྱོར་སོགས་གང་ཡོད་ཀྱིས་ཕན་ཚུན་རོགས་འདེགས་བྱས་ནས་གང་ཅན་རྩོམ་ རིག་གི་བང་མཛོད་ནང་འདི་ལྟར་ཁྱད་རྩོམ་གང་མང་འདོན་ཐུབ་པའི་རེ་བ་ཡོད།

ད་ ལྟ་ནི་དགོང་མོའི་ཆུ་ཚོད་༣་ལྷག་ཟིན་ཚར་འདུག་མོད།ཀྱིས་བསྟེར་བའི་བྲོ་བ་དེས་ངའི་ངལ་དུབ་ཀྱི་ཚོར་བ་སྤྲིན་ལྟར་ཡལ་ ནས་དེབ་ཕྲེང་འདི་བཀླགས་པའི་སེམས་ཚོར་ཞིག་ཀྱང་འདི་ལྟར་འབྲི་འདོད་བྱུང་། མཐའ་ མ་དེར་གྲོགས་མཆོག་སེར་ཤུལ་རིན་ཆེན་དོན་གྲུབ་ལགས་ཀྱི་འདི་ལྟར་སྒྱུ་རྩལ་གྱིས་ ཕྱུག་བའི་དེབ་ཕྲེང་རེ་འདོན་ནས། གངས་ཅན་རྩོམ་རིགས་བང་མཛོད་ནང་ལེགས་སྐྱེས་ ཕུལ་པར་ཤིན་ཏུ་ནས་བཀའ་དྲིན་ཆེ་ཞུ་རྒྱུ་དང་མུ་མཐུད་རྩོམ་རིག་གི་འོད་ལམ་ བསྙེགས་ནས་སྤྱི་ཚོགས་ལ་ལེགས་སྐྱེས་གང་མང་ཕུལ་བའི་རེ་བ་དང་བཅས་ཕྲན་མིང་བློ་ བཟང་གྲགས་པ་འབོད་པའི་གྲོགས་པོ་ནས་རྒྱ་གར་ལྷོ་ཕྱོགས་གྲོང་ཁྱེར་བྷན་ལོར་ན་ ཕྱི་ལོ་༢༠༡༣་ཟླ༧པའི་ཚེས༡༤ཉིན་བྲིས། ཁྲིམས་ལུགས་སློབ་མ། བློ་བཟང་གྲགས་པ།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།